Uit die Pastoor se pen

Ek kyk na die kalender en die opskrif van Ps.105 vul my gemoed.” ’n Dankbare terugblik.”

Dan besef ek hierdie jaar is besig om haas ten einde te snel en wat ons nog vir Jesus in 2016 wil doen moet ons baie gou doen. Dan hoor ek weer hoe broers vir mekaar op die kerk se trap vertel dat hierdie was ‘n ‘rowwe jaar’ gewees. Maar Ps.105 bly klokhelder en ek besef dat as ons terugkyk, ons net met dankbaarheid gevul kan wees. Daar was enorme uitdagings op verskeie gebiede van ons lewens en gemeente gewees. Daar was mense wat ernstig siek was, ander het vriende en familie verloor, ander het weer skade aan hul besittings gehad. Maar deur dit alles het die Here ons tot hier gehelp.

Is Sy genade nie GROOT nie?

Ons het hierdie jaar nuwe lede tot die Lighuis-familie verwelkom en sonder twyfel reeds so lief geraak vir hulle dat ons met groot trots vir die hele wêreld kan sê: “Hierdie is ons mense!”

Baie dankie vir elkeen se bydrae om harmonie en eensgesindheid in die gemeente te bevorder. Dit is ons Koning se begeerte vir ons. Dan is daar twee baie belangrike aspekte wat ‘n gemeente se deure oophou. En dit is DIENSBYWONING en FINANSIES. Baie dankie vir elkeen wat getrou was in die diensbywoning, soms met moeilike omstandighede maar dit is een van die edel vrugte van die Gees nl, GETROUHEID. As u voel daar is nou plek vir verbetering op hierdie gebied – dit is nog nie te laat nie. Baie dankie aan elkeen wat tiendes en offergawes bygedrae het, die Here se werk het dit nodig. Mag die seën van die Here op u rus in alles wat u doen.

Kom ons geniet November en gaan voluit voordat die feestyd en onstspanning aanbreek. Die Pastorie is uit ons harte baie lief vir elkeen van u, en dit is vir ons ‘n groot eer om deel van u te kan wees.

Groete

Past. Chris du Plessis